Ghazal web

ویاړ // عبدالباري جهاني

01.09.2011 17:25

څومره شيريني دي د جنګ د ميدانونو کيسې

څومره آسان دي د شاباش او آفرين ږغونه

څومره خوږې دي د مېړنو د مردۍ خبري

د اتلانو د سرونو د بازار نکلونه

څه پر غوږونو ښې لګیږي پخوانۍ سندري

د مستو پېغلو په اتڼ کي د زمرو نومونه

په څه غرور  د شهیدانو تر مزاره ورځي

د ښايستو نجونو ټولۍ ګېډۍ ګېډۍ ګلونه

                         ؛؛          ؛؛                  ؛؛

خو چا پوښتنه له شهیده د زخمونو کړې؟

چا له اتل سره خواله د پرهارونو کړې؟

چا یې د مرګ پر پوله سترګو ته یو ځل کتلي؟

چا یې په سترګو کي کیسه د ارمانو لیدلې؟

چا د شهید د بوري مور سوی کوګل کتلی؟

چا د ښائستې سر توري کونډي وران اوربل لیدلی؟

چا په سینه کي د مرګي د ګولۍ زور لیدلی؟

چا د زرګونو ارمانو  سوځلی کور کتلی؟

چي زولنو او ځینځیرونو ته نظمونه لیکي

هغه شاعر د سیاه چالونو سړې شپې لیدلي؟

د لړمانو په کاله کي یې خوبونه کړي؟

وچو هډو یې د نېښونو سلسلې څکلي؟

 

د هوښیارانو دا یوه خبر مي نه هېریږي

 «مځکه هغه سوځي چي اور ورباندي ولګیږي »


ستاسو تبصره


لطفاً لاندې افغانستان په انګليسي تورو وليکئ.
Noorulbari Mal

Create Your Badge