Ghazal web

غزل: استاد صديق پسرلی

28.06.2012 02:35

 

د مايوسۍ کره دې ورنشي د چا جنازه
چې ژوند يې اخلي يوه سا د بلې سا جنازه

ابدي کور ته مې يارانو په سندرو ور وړئ
لکه څپو چې وي اخيستې د دريا جنازه

د ښاپيريو هديره وي ممکن بل ستوري کې
چيرته به يوسم د سپيڅلې تمنا جنازه ؟

راځئ غمونو اوږې ورکړو د ثواب لپاره
چې د شپيلۍ له کوڅې وزي د نوا جنازه

څوک به پيدا کړئ چې مې تن په اوښکو ولمبوي
زما په لوګ کلي کې چاته وړئ زما جنازه ؟

لکه الوتی رنګ چې شي له الوتو سره ورک
په دې مادي عالم کې بويه د معنا جنازه

چې نه خيرات وي نه اسقاط حسن يې څه کوي څوک
مګر د شمې اوښکې واخلي د رڼا جنازه

ذوق او غوښتنې هم د ګټو په پلۀ پلونه ږدي نن
د ډم ودونه په زړۀ اوري د ملا جنازه

د دنيا ژوند څه دی ؟ بس خاورې يو پر بل اړوو
په دغو خاورو کې پټيږي د هر چا جنازه

پسرليه څوک مګر په ژوند چاته په ښه نه ورځي
سحر د شپې جنازه وړي شپه د سبا جنازه

 


ستاسو تبصره


لطفاً لاندې افغانستان په انګليسي تورو وليکئ.
Noorulbari Mal

Create Your Badge